Yin - Yang !

Yin - Yang

فلسفة خاصة !

الرمز ده .. أكيد كتير مننا شافوه !

ممكن تكون شفته على النت أو في التي في أو حتى على بعض المنتجات !

اللي بيحطوه كنوع من (البطيخ) لا أكثر ...

أنا عن نفسي أول مرة اسمع عنه كانت من حوالي سنتين في مسلسل Charmed ..

ما علينا .. المهم ركزوا كويس في كل كلمة ...

لإني حاحتاج أفكاركم وفلسفتكم الخاصة في فهم الرمز ده !

- في البداية الرمز ده أصله من الفلسفة الصينية القديمة ...

وبالتحديد قوة واستمرار الرمز كانت في عصر اسمه الـ  Taoism أو Daoism

ودي كانت جماعة فلاسفة ورجال دين من الصين ...

استمرت فلسفتهم وأفكارهم لمدة حوالي 200 سنة ..

ابتداءًا من سنة 550 قبل الميلاد ...

واستخدموا الرمز ده في فلسفة الطب بشكل كبير !!

- الرمز اسمه Yin - Yang (ين - يانج ) ..

وله اسم تاني هو ( Tao ) ...

المهم، لاحظ إن اسم الرمز مكون من شقين ...

وده ياخدنا لفهم المعنى المُجرد للرمز الموجود عندنا ...

الصورة دي بتوضح لك ببساطة اوي ..

ازاي إن الرمز عبارة عن نصف أسود، ونصف أبيض ..

وفيه خط غير مرئي فاصل ما بينهم !

يعني اللونين مش مُتصلين ببعض ...

وفي نفس الوقت، كل نُص فيه نُقطة بلون النُص التاني ...

بالنسبة للنصف الأسود فهو ال Yin ..

وده بيرمز للظلام والليل... والأنوثة "Feminine" !

أما النصف الأبيض وهو ال Yang ...

فبيرمز للضوء، والنهار... والذكورة "Masculine" !

لكن لاحظ كويس ...

إن كل نصف فيه جزء من النصف التاني ...

وهو ده اللي خلاني أفكر كويس في رمز الين واليانج !

قبل ما أبدأ اتكلم عن نُقطة تواصل الفرد مع كلا جانبيه الذكوري والأنثوي !

ويمكن ده حيكون بيمثل نوع من العبط لما تقراه لأول مرة !

أحب أقول إن الرمز بيتم تطبيقه على حاجات كتيرة جدا !

بشرط إنها تكون حاجات مُتناقضة، وفي نفس الوقت مُتكاملة !

يعني زي الخير والشر، الموت والحياة، الشمس والقمر !!

أول نقطة حاتكلم فيها هي الرمز بدلالته !

للذكر والأنثى !

وهما جانبين مُتناقضين طبعًا، 

والحياة لا يمكن تستمر إلا بوجود كلاهم !

ومن معنى الرمز المُجرد ...

نلاقي إن كل جانب فيه جزء من الجانب التاني ..

يعني بمعنى إن الراجل له جانب ذكوري وهو الجانب الطاغي على كونِه !

وفي نفس الوقت له جانب أنثوي في شخصيته!

محدش يستغرب.. لإنك ممكن تكون بتتعايش مع كلا جانبيك بكل بساطة !

من خلال مُعايشتك لتجاربك ومشاعرك ..

سؤالي هو ... وهو ده اللي يهمني اعرف غيري بيفكر فيه ازاي ..

( يا ترى انت على تواصل مع كلا جانبيك؟ وهل بتستشعر ده ولا لأ ؟ )

ويمكن مؤخرًا لما نشرت المدونة بتاعة A Doctor's Tale

ومحدش فكر في إن الدكتور حيكون واحدة ست !

فدي كانت مُقدمة لموضوع الين واليانغ !

وازاي غالبية التفكير في مُجتمعنا طغى عليها الجانب الذكوري ..

وده ممكن اتكلم عنه بعدين ..

أما فلسفتي الخاصة في كده فهي //

|أفضل أشخاص بتقدر تسمو لمستوى فهم المشاعر البشرية بأكملِها

سواء كانت بسيطة أو مُعقدة... هم الأشخاص اللي بيقدروا يتواصلوا مع كلا جانبيهم،

ويقدروا يستغلوا جانبهم الطاغي بطريقة صحيحة... وفي نفس الوقت يقدروا يستثيروا 

جانبهم العكسي في الأوقات المطلوبة |....

تاني نقطة ...

هي علاقة رمز الين واليانج.. بفلسفة الخير والشر !

الرمز بيقولك.. كُل شخص إما يكون شرير وفيه نقطة من الطيبة !

أو طيب وفيه نقطة من الشر !

فلسفتي أنا الخاصة في فهم النقطتين دول وعلاقتهم ببعض هي //

| مفيش حد شرير بطبيعته... كل شخص شرير فيه أسباب دفعته لعمل الشر ده ...

وفي النهاية بيكون جواه بذرة للعمل الطيب ... لو قدر يستخرجها ... ممكن يفاجئك 

بفعل أفعال حميدة فوق ما تتخيل | ..

أما من الناحية العكسية ..

فميش جملة أفضل تلخص فلسفتي غير //

| اتقِ شرَ الحليمِ إذا غَضِب |

- سؤالي هنا بقى ..

يا ترى ايه هي طبيعتك ؟

وأي جانب من الشر والطيبة هو اللي بيطغى عليك ؟

ويا ترى ايه فلسفتك في التواصل مع الجانبين دول ؟؟

- طبعًا الموضوع كبير اوي ..

ومش حينفع اخلص كلام عنه من مرة واحدة ..

علشان كده ليا عودة مرة تانية ..

بالمناسبة دي بعض الأمثلة لمفردات كلا الجزأين من رمز الين واليانج !

اللي بلون الخلفية الأسود هي الين !

أما الخلفية الرمادي فهي اليانج !

المادة - الروح !

الأرض - السماء !

الماء - النار !

البرد - الحرارة !

الموت - الحياة !

السهول - الجبال !

الاستقبال - الإبداع !

يعني .. اللي حيب يفكر في تواصل كل اتنين مع بعض ..

يبقى يفكر ..

وبإذن الله في المرة الجاية ..

حاتكلم اكتر عن علاقة الرمز بالطب !

واللي حتى الآن باحاول استوعبها ^ ^

TNT

13/4/2010