" نحنُ مـعك يا جيمي" !

" نحنُ مـعك يا جيمي" !

مُنذُ فترة من الزمن ..

كُنت قاعد مع واحد صاحبي عزيز عليّ ..

وكنا بالتحديد في سكشن هستولوجي !

فقلت أسأله سؤال جه على بالي ..

سألته : "إلا انت صحيح ناوي تنتخب مين في انتخابات الرئاسة السنة دي؟ "

- سكت شوية ... وبعدها هتف بصورة إعلانية :

" نحنُ معك يا جيمي " !

سألته : "جيمي ! .. جيمي مين ده ؟! "

- قال لي بعد ما حس بنوع من الإهانة :

"جيمي .. جيمي كونجراتيلوشينز " !

* أصل صاحبي ده خريج مدرسة أجنبية كده مشهورة .. عقبال عيالكم .. هع !

ما علينا ..

فهمت بعدها إن جيمي هو المدعو  ( جمال مُبارك ) أمين لجنة السياسات بالحزب الوطني !

واللي أنا شخصيًا نفسي أعرف ايه فايدة اللجنة دي ..

الشيء الغريب إن صاحبي ده كان شبه مُصمم على إن جمال مُبارك 

بيمثل جيل الشباب ( حتى ال 40 ) ..

وإن مصر محتاجة لقائد شاب يقودها بفكر جديد وحكيم !

وأنا شخصيًا معنديش مانع إني انتخب "جيمي"

بس المشكلة إن فيه ناس بتقول إن مصر حترجع ملكية !!

يا رااااااجل !!!!

- المهم في اليوم ده تقريبًا ..

يعني من حوالي أسبوعين كده ..

عملت الإستفتاء في البلوج ..

عن ( انت ناوي تنتخب مين لرئاسة الجمهورية ؟ )

مع ملاحظة إن الأسماء اللي أوردتها لسه محدش أعلن إنه حيترشح رسميًا ..

ونتيجة الإستفتاء كانت كالآتي :-

- طبعًا سيبكم من الأرقام والبطيخ ده كله !

لإنها كلها حاجات تمويهية وليس أكثر ..

خلونا نشوف المهم ..

وهو إني كواحد من الناس ...

توقعت إن على الأقل فيه نسبة لازم تختار (البرادعي) كرئيس جديد لمصر ..

وده شيء واضح جدًا في الحملات القائمة على الفايس بوك ...

واللي كل يوم بتوصلني منهم دعوة للإنضمام ..

وضيف عليهم كمان حملات المُساندة على مواقع كتيرة من ضمنهم blogspot

وكله رافع شعار (نعم للبرادعي ... نعم للتغيير ) !

- طيب .. أنا واحد من الناس ملهوش في السياسة أصلا ..

لكنه محتاج تغيير لحال البلد -وده شيء مفروغ منه -

لما سمعت البرادعي في لقاء خاص له على أحد البرامج ..

لقيته شخص ذكي جدًا ..  عقله يودي في داهية ..

وهو فعلا راح الداهية دي خلاص .. 

واللي هي وكالة الطاقة الذرية ..

بس ثواني .. أنا لاحظت إنه مش بيعرف يتكلم عربي حلو أصلا !

كان بيقطع في الكلام !!

ومعنديش فكرة ايه السبب ..

بس دي مش حاجة حلوة طبعًا ..

غير كده..

كل ما افتح الجريدة يوم الخميس (اليوم اللي بنجيبه فيها ) ..

ألاقي في أول صفحة ... وغالبًا بقلم رئيس التحرير ..

مقال فيه سخرية وهجوم على موقف البرادعي لو تم ترشيحه لرئاسة مصر !

لكن الحق يُقال ..

إن لو البرادعي بقى رئيس لمصر ..

فمصر حتكسب سياسة خارجية كويسة جدًا ..

لكن المشكلة الوحيدة هي //

فين خطط البرادعي للداخل لا الخارج ؟!

- نروح لتاني شخص ..

وهو "عمرو موسى " 

عمرو موسى .. وهو أمين جامعة الدول العربية ..

ورئيس خارجية مصر الأسبق ..

هو شخصية مُحترمة جدًا في رأيي ..

لما سألوه انت ناوي ترشح نفسك ولا لأ ..

قال : "أنا قدمت كتير كوزير خارجية .. وكتير كأمين عام ..

أعتقد حان الوقت إني أقدم حاجة أكبر "

وبالرغم من ده ..

مسمعتش عن أخبار موثقة لنيته في الترشيح ..

لكن لو حصل ورشح نفسه ..

مع وجود برنامج انتخابي يُخترم !

فأنا كواحد من الشعب لا أستبعد إني أختاره !

- نروح بقى لرئيس حزب الغد ..

( أيمن نور ) !

واللي عرفت إنه ناوي يدخل الانتخابات للمرة التانية ..

والمرة دي بنائبة واحدة من مجلس الشعب .. ونائبة مسيحية كمان !

شجاعة أحييه عليه إلى حدٍ ما ..

لكن يبقى في النهاية ..

من ( .... ) للأحزاب المُعارضة .. يا قلبي لا تحزن !

- فيه بقى فئة كمان من الناس ..

ودول غالبًا الناس الكبيرة في السن ..

ماشيين مع سياسة "اللي نعرفه أحسن من اللي منعرفهوش"

وأنا شخصيًا ..

كُنت أعرف ناس في الانتخابات اللي فاتت ..

كانوا مُعارضين تمامًا .. وكُله رايح وناوي ينتخب الراجل ده بتاع حزب الوفد !

ولما راحوا الانتخابات في الآخر ..

اختاروا ( محمد حُسني مُبارك ) !

وده من مُنطلق الفكرة السلبية .. 

( اشمعنى أنا يعني اللي حاغير حاجة بصوتي !! )

بس الغريبة بقى ..

إني واحد من الناس ساعات باميل للسياسة دي !

بمعنى إني أفكر في اللي حييجي بداله .. وأسأل نفسي يا ترى اللي جاي حيعمل فينا ايه !!

بس الفكرة دي كانت لحد فترة من الزمن ..

والراجل الكبير ده خلاص .. عتى عليه الزمن !

وأنا لو مكانه ميكملش ..

- طبعًا ما علينا من كُل ده !

احنا مالنا !

مين قال أصلا إن نتيجة الإستفتاء فيها حد من دول كسب !

هع !

أيها القوم ..

الجميع قام بالتصويت !

الجميع قرر !

الجميع رشح !

الجميع اختار !

5aleek Fe 7alek

لرئاسة الجمهورية !

وده طبعًا انتصار شخصي هائل للمدونة !

هعع !

فنوعدكم بالتغيير !

وبُكره الشعب كله حيمشي يقول 7 × 5 !!

:D

وهو ده كان الهدف الدنيء من الإستفتاء .. هع !

- أخيرًا .. 

نحب نقولكم خبر من مصادرنا الرسمية الموثوق منها تمامًا (جدًا جدًا ) !

وهو إن مدونتنا وصحابنا وحبايبنا ..

كله حيرفع شعار انتخابات مصر 2010

| يا تخليك في حالك ...... يا تنتخب مُبارك |

وييجي واحد من بتوع (لقد وقعنا في الفخ ) ويسألني : أي واحد ؟

فأجاوبه وأقول ... لما حتشوف ورقة الانتخابات ..

حتلاقي مكتوب فيها أول اختيار ..

( الواد وأبوه ) ..

Package  واحدة يعني !!!!

وخليكم في حالكم !!

TNT

17/4/2010