قمة التهييس في أفراح إبليس !

قمة التهييس في أفراح إبليس !

اوعى حد يفكر إني باشوف مُسلسلات عربي !

أكيد لأ .. مش بعد ديسبرت هاوس وايفز، وجريز اناتومي، وديكستر ...

حاروح أتفرج مخصوص على أفراح إبليس !!

الحكاية باختصار...

إنهم في البيت عندي كانوا بيتفرجوا على المسلسل ده في الأيام اللي فاتت ..

فكنت بما سامعه وشايفه من غير قصد، بما إن الكومبيوتر جنب التي في !

ما علينا ...

أقولكم بقى رأيي في المُسلسل الرهيب ده ...

بما إنها التجربة الثانية للفنان السوري "جمال سليمان "

بعد مسلسل (حدائق الشيطان) ، وواضح أنه تخصص عفاريت !

تلاقي المسلسل بيبدأ بداية قوية وأداء قوي لشخصية الراجل ده ..

وهي شخصية صعيدي جبار، مُستبد، محدش بيقدر يقول له لأ ..

ولا حتى مراته "عبلة كامل"، ولا عياله التلاتة !

بعدها الراجل بيحب الشغالة اللي عندهم، اللي هي في مقام بنته ..

وطبعا دي الدراما المعهودة على المسلسلات المصرية !

ومراته تكتشف حبه ليها، بس مش حتواجهه أكيد، وإلا كان المسلسل خلص من الحلقة العاشرة...

وبعدين تدخل الحكاية في موضوع تاني خالص،

وهو الانتخابات، وييجي البطل "جمال سليمان " يقتل واحد من المُرشحين،

واللي يصادف أنه أبو جوز بنته !

وده طبعا علشان واحد مُرشح تاني هو اللي يكسب بالتزكية...

وتيجي الحكاية بقى تدخل في الموضوع المُعتاد جدًا جدًا، وهو التار !

وبنفس الطريقة المُملة ...

العائلة دي عاوزة تاخد بتارها، إنها تقتل ابن "جمال سليمان" ، واللي بيلعب دوره

"أحمد سعيد عبد الغني "...

واللي هو أصلا طالع لأبوه، ومتجوز على مراته بقاله 5 سنين ، وحيجيب عيل من مراته التانية كمان !

--------

دي حكاية المسلسل ..

أقولكم بقى قمة التهييس فيه !

أولا السيناريو سيء للغاية ...

مع إن المؤلف راجل جامد يعني، كنا بنشوف له مُسلسلات زمان !

وهو "محمد صفاء عامر "

ثانيا : الإخراج ... بطيخي على الآخر ...

يعني حاجات غير مُبررة خالص بتحصل !

وكأنهم بيعملوا المشاهد علشان تخدم كل حاجة هم عاوزينها !

ثالثا : الأداء !

- جمال سليمان، أداؤه مُبالغ فيه فعلاً !

- عبلة كامل ... هي الأفضل طبعًا ... بجد الست دي من أفضل الممثلات المصريات اللي موجودين حاليًا،

ومتقلش في قدراتها عن حد من الممثلات الأجانب اللي الواحد بيشوفهم !

- أحمد سعيد عبد الغني... هو الشخص الوحيد اللي بعد عبلة كامل، اللي اتقن دوره !

غير كده.. مكانش فيه حد بيعرف يمثل أصلا !

رابعًا : الأحداث !!

ودي قمة التهييس ! ... كل شوية يعملوا مسلسل جديد جوا المسلسل ذات نفسه !

بس المصيبة بقى كانت في النهاية ..

اسمعوا النهاية بقى بتاعة المسلسل !

ابن "جمال سليمان " كان راجع البلد ...

مع مراته التانية، وابنهم الصغير ، وأبو وأم مراته !

فبيهجم عليهم، العائلة اللي عاوزة تاخد بالتار ...

علشان يقتلوا "أحمد سعيد عبد الغني "

وعلى الرغم من إنه هو الشخص الشرير في الليلة دي كلها !

هو الوحيد اللي مش حيموت !!!!!!!!!!!!!!!

يا سُبحان الله !

مراته، وأبوها، وأمها .. ماتوا ..

وابنهم الصغير وقع في الأرض، وأخدوه رهينة !

- ييجي بعد كده ...

في الحلقة الأخيرة ..

يتقتل أحمد سعيد عبد الغني، بعد 3 رصاصات !

2 في صدره، وواحدة في ضهره ..

وبعدها اخدوه المستشفى، وقعد يتكلم هو وأبوه شوية هناك !

لا تعليق فعلا !

وبعدها بيومين كده ... جمال سليمان ييجي له شلل !

وفي نفس الوقت، بترجع الشغالة اللي كان بيحبها، واللي أصلا كان قتل جوزها في ليلة فرحهم !

وبتيجي علشان تقتله ، ويا دوبك بترفع السكينة .. يروحوا ضاربينها بالنار ...

وتموت !

ويقولك : إلى اللقاء في الجزء الثاني !!!!!!!!!!!!

حرام بجد !

أنا اتشليت من المسلسل، بالرغم إني أصلا مش اللي باتفرج عليه !

يعني تقديري النهائي له ...

2/ 10

علشان عبلة كامل، وأحمد سعيد عبد الغني ..

والموسيقى التصويرية كانت قوية كمان !

نصيحة أخيرة ...

لو حصل وجت فرصة إنك تشوف المسلسل ده ..

أو تشوف الجزء الثاني، واللي غالبا .. الأحفاد حيكبروا وياخدوا بالتار بقى !

وحيسموه "أفراح عيال إبليس " أو "أفراح الأبالسة "

اوعى تفكر إنك تشوفه !

TNT

6/4/2010