يوم قال لي "أنه كافر" !

يوم قال لي "أنه كافر" !

- الواد ده شكله "سـيـس " !

شوف شكله ... شوف شعره ...

شوف...كُل دي "حظاظات" !!

أكيد الواد ده " Emo" ...

لأ .. شوف التي شيرت اللي لابسه ..

التي شيرت لونه بينك ... وعليه جماجم ..

يبقى "Metal " ؟؟

ايمو .. ميتال ! .. مش فارقة يعني ..

اهو الاتنين محتاجين recycling !

- التي شيرت، عليه جماجم ..

جماجم وعُصيان !

لأ دي مش عُصيان !

دي صُلبان !! (جمع صليب) !

!!!!!!!

تعال هنا يا ابني يا حبيبي انت ..

هو انت مش اسمك أحمد ؟ .. أو محمد تقريبًا ؟

× الواد : أه !

طيب وايه اللي انت لابسه ده ..

انت مش شايف الصليب اللي على التي شيرت ؟!

× الواد : أه .. عادي يعني .. ما اهو أصل أنا كافر !

كافر ايه يا #^&3$^%& !

× الواد (وهو بيضحك) : أه والله .. أنا كافر .. انتِ مش مصدقة ولا ايه !

(س) من الناس : يا بني عيب تقول كده .. بجد مينفعش تقول كده ..

الواد بعدها كان جاي عليّ ... ناوي يكمل الليلة على دماغي !

× الواد (ببلاهة) : على فكرة بجد .. أنا كافر !

- T .. اللي هوا أنا (ببرود لا حدود له):

ايه ده .. بجد ؟ Wow !

Congratulations  ...

- الواد .. جاتله صدمة عصبية تقريبًا ..

وبص لي بنفس البلاهة !

والأهم . إنه خرج من المكان (وقفاه يقمر عيش ) !!!

STOP 

!!

----------

الحكاية دي حصلت لي على فكرة ..

بالتحديد في الصيف اللي فات !

وبنفس التفاصيل والتعبيرات تقريبًا !

وبمرور الزمن على الحكاية دي ..

بدأت أشوفها من مناظير أخرى !

- الواد ده كان اسمه " أحمد " فعلاً ، وكان بيلعب في ال 15 سنة !

وكان جزء من شلة كبيرة، عبارة عن خليط من الايمو والميتال والبطيخ ده كله ..

السؤال اللي طرحته على نفسي بعد كده ..

هو الواد ده أصلا فاهم يعني ايه كلمة " كافر " ؟!

أنا شخصيًا أشك ..

لإن الموضوع مش بالبساطة دي ..

الكلمة دي كبيرة فعلاً ..

معناها كبير جدًا ومش بسيط لدرجة إن حد عنده 15 سنة يفهمه ويجزم بيه !

واللي يؤكد لي على كده .. نظرة البلاهة اللي على وجهه !

وبعدين تعالى هنا يا روح قلبي ..

الصليب ده رمز المسيحية ..

من امتى كانت المسيحية "كُفر" ؟

وأقصد المسيحية اللي نزل بيها المسيح عليه السلام ..

علشان بس محدش ييجي يمسك في الجملة دي !

الكُفربمعناه المُجرد هو إنك تكفر بوجود الله سبحانه وتعالى ..

وتُنكر وجوده ...

( أعاذنا الله من شر ذلك ) ..

طيب شوف الكلمتين دول بقى ..

وانا حاخاطبك كواحد عنده 15 سنة ...

مش انت بتقول إنك كافر ..

طيب ليه كل شوية لما تيجي تتعجب من حاجة ..

حتى مع صحابك الايمو والميتال .. تقول : الله !!

أو لما حد يسألك عامل ايه، كنت بتجاوب : الحمد لله !

؟؟؟

----------

المسألة كلها مسألة حوار وتربية ..

وقدر المعلومات اللي بتوصل للعيال دلوقت ..

وده بيتضمن الجيل اللي أنا فيه .. وبيتضمني شخصيًا ..

أنا مش عارف ليه لما فكرت بعمق في الموضوع ده ...

حسيت بنوع من الأسى ..

يمكن لإن ورا كل الحوار اللي دار ما بيني وما بينه ..

استشفيت شيء من (اللافهم) و( اللاوعي) ..

حاجتين كانوا بيطغوا على براءة الواد ده ..

لو رجعت بالزمن وعدت الموضوع ده تاني ..

فأنا حاقوله كل الكلام ده ..

بس في الأول حاسأله سؤال بسيط ..

( انت ده بيعني لك ايه ؟ ) ...

وأقصد ب (ده ) .. كل اللي انت فيه ..

من مظهر، وأصحاب، واعتقادات فارغة ..

هل بيعني لك هوية ؟

بيعني لك تمرد ؟

أفعال مُراهقة ؟

؟؟؟

مش عاوز أتحدى نفسي وأقول إنه مكانش حيقدر يجاوب ..

لإنه فعلاً مكانش حيجاوب ..

باختصار الواد ده مش (كافر ) ..

ده مش (فاهم) !!

وبالرغم من إنك ممكن تروح بيتهم .. وتشوف أهله بيصلوا وبيصوموا ..

ومش بعيد يكونوا مُتدينين كمان ..

( ودي حاجة شفتها في نماذج تانية مع ناس تانية )..

إلا إنه برضه مش فاهم ..

لإن مفيش حوار ..

- آخر حاجة حاقولها ..

هو إني الصراحة ندمان على عدم إتمام رد فعلي ..

هو كده كده يستحق البرود المُفاجيء ..

لكن كان يستحق برضه إني أسأله السؤال ده ..

بس للأسف .. مكنتش فكرت فيه ساعتها ...

ومكنتش أقدر افتح معاه ( الحوار ) ده !

كان الله في العون ...

و على رأي الشيخ في صلاة الجمعة ...

( مفيش حواااااااااااااااار ) ..

* مع مُلاحظة إن الشيخ أثناء الدعاء ..

(زعق) في وش واحد ...

بصوت جهوري جدًا .. وقال له : " اقعد يا أخييييييي " !

قال حوار قال !

MOSEEBA

11/4/2010