يوم لما خدوني الفرح معـاهم !

يوم لما خدوني الفرح معاهم !

مين قال أني مش باحب الأفراح ؟!

دي الأفراح جميلة خالص .. والناس كلها بتكون على طبيعتها !!

وكل فرح مُختلف عن التاني تمامًا !!

حد قال أني مش باحب الأفراح ؟!

ما علينا ..

المهم .. امبارح كان عندي فرح في المُنتزه !

وأصلاً أنا مكنتش عاوز أروح ...

لأ واللي يغيظ بقى ..

من قبل الفرح، وهم مش لاقيين حد يزنوا على دماغه غيري ..

" لازم تيجي الفرح معانا يا T "

" حتلبس بدلة يا T "

" مش حتلبس جينز يا T "

" حتلبس كرافتة يا T "

" مش حتعمل شعرك سبايكي يا T وإلا حتبقى عار على العائلة يا T "

كان ناقص يقولوا لي/ " حتعمل شعرك على جنب يا T "

المشكلة بقى إني رحت ولبست البدلة والكرافتة !

بس طبعًا عملت شعري على مزاجي .. 

تسريحة جديدة بالأصح !

أول ما شافوها قالوا " ايه الهبل ده ! "

هعع !

يفهموا ايه هم أصلاً في الشعر وجمال الشعر ؟!

وبعدين أنا كده .. أنا T !!

°°°°°°°°°°°°°°°°

- وصلنا الفرح الساعة 8 !

في واحدة من قاعات المُنتزة .. واللي كانت في الأصل ضمن قصر خاص بخادمات الملك !

 ....

كانت قاعة صُغيرة كده ولذيذة ..

بما إن العريس قريب العروسة ..

يعني زيتنا في دقيقنا ..

والمعازيم مش كتير ..

والعروسة للعريس والجري للمتاعيس ..

ولغاية الساعة 10 والعريس والعروسة لسه موصلوش ..

لدرجة إني بدأت أتعجب من وجود حد نحس في الفرح .. (هع ! ) !

المهم قلت لهم يتصلوا بالعروسة يشوفوها جاية ولا غيرت رأيها ؟!

هيهيهي ..

في الفترة بقى اللي ما بين الساعة 8 لغاية ما العروسة وصلت ..

قعدت  أتعرف على بعض الناس في الفرح !

- يعني مثلا .. أم العريس كانت جاية تسلم على ماي مازر !

بما إنهم يعرفوا بعض من مكانٍ ما !!

بعدها ماي مازر بتقدمني ليها ..

- ماي مازر / ابني .. T !

- أم العريس / دكتوور ؟!

- أنا / لأ .. T حضرتك !!

- أم العريس / هيهي .. دمك خفيف يا مضروب !

- أنا / على فكرة اسمي T  مش دكتوور !

طبعًا بعدها افتكرت واستوعبت ..

إن العلامة المُسجلة في عائلتنا وعائلتهم ..

هي الدكتور والمهندس ..

يعني لمؤخذة لو حد تاني مش حيسلموا عليك ..

قال دكتور قال !

ميعرفوش اللي فيها ..

- بعدها بشوية ..

واحد ( X ) من قرايبنا ..

يقول لي/ "ايه يا دكتور T .. انت عامل نفسك مؤدب ولا ايه ؟ "

كنت عاوز اقوله " اه .. للأسف " !

هع !

°°°°°°°°°°°°°°°°

- المهم .. وصلت الساعة 10.30

وأخيرًا وصل العريس والعروسة ..

وبدأ الفرح .. بالزفة المُعتادة !

وفكروني معملش زفة يوم فرحي ..

لإن بعد اللي شفته من رقص العريس (اللي يستحق إنه يتسجن عليه ) !

معنديش استعداد أعمل زفة !

وبعدها طلعوا القاعة ( في الاسانسير ) !!!

وهم داخلين بقى ..

العريس الله ينور عليه .. قام دايس على ديل الفستان !

هو مش داس ومشى ..

لأ داس ووقف .. والعروسة كانت ماشية !

وكادت أن تقع .. أو كاد الفستان ينقطع !

بس الحمد لله ربنا ستر !!

وأصلا العريس كان لابس ستايل غريب كده ..

سمعت أقاويل من المعازيم إن اسمه (ستايل المروحة ) !

اللي هو ولا بابيون ولا كرافت !

حاجة غريبة كده .. وفيها دبوس في النص !

بس أنا شخصيًا كنت شايفه أقرب للبس ركوب الخيل !

بجد كان فاضل له كُرباج وكاب .. والحصان طبعًا :D !

- وبعدين جت فقرتي المُفضلة ..

وهي فقرة ( توليع العروسة ) !

حيثُ تقدمت فرقة حاملي المشاعل ..

وطافت حول العروسين الحلوين !

وبعدها بقى ..

جابوا (شعلة) و ادوها للعريس ..

و شُعلة تانية للعروسة ..

علشان يولعوا بعض !

واهو يبقى عيش وولعة !!

هعع !

- وبعدها كانت فقرة ( تسميم العروسة ) !

ما هو بعد التوليع ييجي التسميم !

وجابوا لهم ( الشراب ) السحري اللي حيشربوه !

وطبعًا وزعوا على المعازيم كُلها !

لأ وايه الناس كُلها أخدت (شربات) لونها أحمر كده !

إلا أنا !!

يُقع في حظي كوابة قمر الدين !!

كانت كوباية يتيمة كده لونها orange .. وشكلها ميطمنش !

بس على مين يا عم !

شربتها برضه ! ومش عارف حتى الآن هي ايه !!

وعلشان كده ..

فكروني برضه يوم فرحي ..

يكون المشروب الرسمي هو (الفودكا) أو (مارتيني ) ..

أصل أنا عارف فيه ناس تموت في الحاجات دي !

°°°°°°°°°°°°°°°°

- مفيش داعي بقى أوصف الرقص والهلس والبطيخ ده كُله !

علشان لو وصفت الكلام ده .. محتاج بلوج كاملة لوحدها !!

وأصلا .. أنا كُنت قاعد على ترابيزة .. 

أقرب ما يقال عنها هي "عواجيز الفرح " !

وعلى فكرة عواجيز الفرح دول مطلعوش عواجيز ..

يعني مش لازم يكونوا كُبار ..

لأ ده مُمكن يكون أي حد تتخيله !

ومش عاتق أي حد في الفرح في حاله !

والمُتمكن فيهم .. بيتكلم كمان عن الناس اللي مش في الفرح أصلاً !

زي مثلا ( X2 ) من قرايبنا برضه ..

اللي فضل يكلم "الدكتور" اللي هو أنا !

لدرجة إني كنت شايف الحروف بتاعة الكلمات وهي بتقع منه كده وهو بيتكلم !!

وكُل اللي طالع عليا في دماغي ..

Bla Bla Bla Bla BLa Bla Bla Bla Bla BLa

°°°°°°°°°°°°°°°°

- بعد كده .. جت أسخف فقرة شفتها في فرح !!

فقرة الفراعنة !!!

فراعنة ايه ؟!

هو فرح مين يا ناس ؟!

بجد والله كانوا جايبين فراعنة !

والتورتة كانت فرعونية برضه !!

أنا مش حاحكي على الفقرة دي أحسن !!!

نو كومنت بجد !!

- وبعدين .. جت فقرتي المُفضلة في الأفراح !

" البوفيه " .. وبالذات لو زي البوفيه ده .. Open !

واللي لأول مرة .. من كُتر السخافة ميكونش ليا نفس أكل ..!

بس تقول ايه للبشر !

الناس كلها فجأة بقوا عاوزين يأكلوني أنا بس !

" جرى ايه يا T .. انت مكسوف تاكل ولا ايه ؟ "

" لأ لأ يا T .. زعلتني منك كده "

وبعدين ده يقوم يجيب لي طبق !

وده يقوم يجيب لي طبق تاني !

وده يجيب طبق حلو !

وأنا مش عاوز آكل .. ومأكلتش طبعًا ..

هم أكلوا كل اللي جابوه لي !!

هعع !

"ينيلك يا T .. سديت نفسي عن الأكل " !

ينيلك انت يا بعييييد .. ده انت واكل طبقين لوحدك يا راجل !!!

°°°°°°°°°°°°°°°°

- المهم .. رجع العريس والعروسة تاني !

وقعدوا يغنوا لبعض . والكلام ده كله !

حتى انتهى الفرح في سلام !

و عُدت للبيت الساعة 3 الصبح !!!!!!!

وكله بيودعني /

" نشوفك على خير يا دكتوووور " !

يا جماعة قلت لكم اسمي  T !!!!

°°°°°°°°°°°°°°°°

- كلمة أخيرة ..

على فكرة .. أنا طبيعتي باحب الأفراح .. وأموت في الهلس غالبًا !

بس ده يعتمد على فرح مين ..

وهل فيه حد حاضر ممكن انسجم معاه ولا لأ !

علشان بس محدش يقول عليا إني Anti-Wedding !

بس الحق يُقال .. إن الأفراح عندنا محتاجة makeover  أصلا !

لإنها بقت شبه بعض جدًا جدًا !

يلا ..

عقبال عندكم ان شاء الله !

:D

الدكتور !

أقصد ..

       T         

24/4/2010 

هع !