Baby On Board !

Baby  -  On  -  Board !

حاجة من أكتر الحاجات اللي كانت وما زالت بتغيظني ..

هي الناس اللي بيركبوا ولادهم - الأطفال - جنبهم في العربيات ..

وطبعًا أقصد في الكرسي الأمامي ..

ويمكن يكون البعض لاحظ إن الحكاية دي بتستفزني ..

والدليل حتى إني سبق وذكرتها في "حكاية مُصيبة ! "

أما اللي يغيظ أكتر بقى ..

لمّا تلاقي الأب سايق العربية ..

وابنه أو بنته اللي أقل من 5 سنين ..

يكونوا قاعدين على حِجره !!

قال ايييييييه .. بيلعبوا في الدريكسيون !!!!

- وتيجي واحدة تانية ...

تخلي ابنها الصُغير يقعد جنبها وهي سايقها ..

ومن غير حتى حزام أمان !

وهو أصلا لو لبس الحزام .. مش حييجي على مقاسه !

لإن الواد بيكون شبر ونُص !!

وتلاقيهم ماشيين على الطريق السريع على البحر ..

بسرعات جنونية !!

عادي يعني !!

- ولا بقى أيام المدارس !

لمّا العربية تكون 128 ..

وتلاقي فيها حوالي 20 عيّل راكبين ورا !

وده من أجل تحقيق الإعلان الشهير ..

{ ليه تُزنُق نفسك ؟؟!

تيتي داتا .. تمتلك كُل سِعة الإنترنت في مصر ! }

هع !!

- على فكرة أنا مش باكتب الكلام ده ..

من أجل الانتقاد للوضع الحالي !

لأ خالص !!

أنا باكتبه كنوع من التحية للناس اللي بدأت فعلاً في الاهتمام أكتر بأطفالها !

وده لإني خلال الأيام اللي فاتت ..

لقيت ناس كتيرة بتقعد أطفالها في الكرسي المُخصص ليهم ورا !

وأكتر من عربية لقيتها معلّقة علامة ..

| Baby On Board |

يعني فيه طفل في العربية دي يا بشر !

وعلى فكرة كانوا ناس عاديين تمامًا ..

راكبين عربيات عادية .. يعني مش عربيات فارهة ولا حاجة !

لأ .. عادي يعني ..

- بس تيجي بقى المُشكلة ..

في سوّاق ذكي زي اللي أنا ركبت معاه من كام يوم ..

واللي تقريبًاكان على وشك إنه يطيح بعربية معلّقة العلامة دي ..

وبالتحديد من الناحية اللي الطفل كان قاعد فيها ..

وده طبعًا إما جهل أو غباء اجتماعي ..

وفي كلا الحالتين ..

الواحد عنده أمل إننا ممكن نكون جيل جديد بعد كده ..

يبدأ بحاجة بسيطة زي دي ..

لإن للأسف حوادث الأطفال اللي زي دي ..

بتنتهي نهايات مآساوية فعلا ..

وأصلا في دول الخارج ..

ممنوع تواجد الأطفال أقل من سن وطول مُعين في المقعد الأمامي ..

وإلا تتحرر كمُخالفة ..

وفي حالة إصابة الطفل بأي ضرر ..

بتتسجل الحالة على أنها سوء اهتمام من قِبل ولي الأمر !

- كلمة أخيرة ..

عن العلامة اللي ذكرتها ..

Baby On Board

فالعلامة لازم تتعلق أثناء تواجد الطفل داخل العربية فقط !

يعني المفروض تتشال بعد ما ينزل منها ..

لإن الهدف من العلامة ..

هو إن العربيات التانية تاخد بالها ..

وفي حالة الحوادث لا قدر الله ..

يعرفوا إن كان فيه طفل في العربية دي ..

لإن عادةَ الأطفال بيطيروا بالكرسي بتاعهم ..

ومحدش ييجي يسألني بيطيروا ازاي 

علشان حاقوله / 7 × 5 !!

أي خدعة ..

كان معاكم تي ..

أمين الحضانة !

:D

    TNT

1/7/2010