حكايـة مُصـيـبـة !! (5)

حكاية مُصيبة !

+ الحلقة الخامسة (5)+

"حِـكـايـة ريـم !"

One can have a dream baby

Two can make the dream so real !

One can talk about living love

two can see how it really feels !

أنا لقيت الأغنية دي على الأيبود بتاعي !

أنا أصلا مكنتش أعرف إني عندي أيبود ..

بس لقيته بالصُدفة وأنا باقلب في المكتب ..

الأغنية عتيقة إلى حدٍ ما !

واضح من نغمتها ورِتمها إنها قديمة ..

وواضح إن عندي أذن موسيقية عالية ..

One can wish upon a star

Two can make a wish come true !

فضلت مشغل الأغنية طول الصُبح ..

من ساعة ما صحيت من النوم، وأنا عمّال أتنطط وأترقص على الأغنية دي ..

كان ليها سحر خاص ..

الأغنية عنوانها It takes Two baby ..

يعني بتتكلم عن اتنين !

بس أنا دايمًا كُنت باستقبل منها الجزء الأولاني بس في دماغي ..

الجُزء الخاص بالواحد !

One Can stand alone in the dark !

أنا كُنت وحدي !

مجروح ..

مش فاكر أي حاجة ..

صاحبي مش موجود حاليًا ..

ماما نزلت !

خطيبتي السابقة في البيت اللي في الوش ..

وأختي مش شقيقتي جاية النهارده !

لكني في النهاية كُنت وحدي !

مش فاكر !

- فضلت أجرب كُل الهدوم اللي عندي ..

على أنغام الأغنية طبعًا ..

جربت كُل بنطلون .. كُل تي شيرت !

كُل كاب .. وكُل جزمة وكُل كوتشي ..

أحمر وأسود ..

أزرق وأخضر ..

أصفر ..

أبيض ..

جميع الألوان تقريبًا ..

الهدوم بالألوان الغامقة كانت هدومي ..

والألوان الفاتحة كانت الهدوم اللي جابها لي صاحبي ..

ما عدا اللون الأبيض .. كان هدومي برضه ..

وما أكتر اللون الأبيض في الدولاب عندي ..

It Takes 2 Baby !

باب الأوضة اتفتح فجأة .. وأنا لسه بالبس تي شيرت أزرق !

It Takes 2 Baby !

النغمة بقت مُثيرة جدًا ..

في نفس اللحظة اللي دخل فيها صاحبي الأوضة ..

بص لي باستغراب ..

أغاني .. وهدوم .. وبهدلة ..

واضح إن حالتي كانت صعبة  ..

It Takes 2 Baby !

ًصاحبي دخل الأوضة ..

أخدته من ايده ..

وحاولت أخليه يرقص على النغمة ..

بس هو ضحك ، وهو بيحاول يفلت مني ..

أما أنا فكملت رقص وتنطيط !

كانت أحلى حتة في الأغنية كُلها !

It takes 2 Baby ..

You know it takes TWO !!

ايوه أنا عارف إن العملية محتاجة اتنين !

عارف الكلام ده كويس ..

وبالرغم من إني صاحبي معايا حاليًا ..

وإن ماما معايا أغلب الوقت ..

وإن سمر رجعت تاني لشارعنا !

وحتى ريم جاية النهارده !

إلا إن كُل دول كانوا بيمثلوا الشخص التاني بس !

لإن الشخص الأولاني ... واللي هو أنا ..

مكانش موجود !!

مش قُلت لكم ..

أنا مش فااااكر !!

>>>>>>>>>  <<<<<<<<<

"ايه ده كُله .. ايه ده كُله .. انت خلاص حترجع لعهدك القديم !!؟ "

أكرم سألني السؤال العجيب ده ..

وهو لسه بيضحك من تأثير مشهد الرقص !

- ( عهدي القديم !!) 

رديت عليه وأنا باعمل تعبير غريب كده بوشي ..

وبعدها كملت / ( لو عهدي القديم كان أغاني وهلس .. يبقى بلاش افتكره أحسن ! )

أكرم ضحك .. كالعادة يعني ..

وسألني وهو بيشاور على الهدوم المرمية في كل حتة / "بس ليه كُل الهدوم دي ؟ "

( علشان أكون في أفضل حالاتي لاستقبال ريم !! )

رديت عليه !

- طفيت الأغنية .. وقلعت التي شيرت الأزرق ولبست واحد أحمر !

أما أكرم .. فكان معاه شنطة هاند باج صغيرة ..

فتحها وطلع منها كاميرا ديجيتال !!

وعطاني الكاميرا بتردد !

مسكت الكاميرا وبصيت فيها زي ما تكون قُنبلة !

( ايه دي ؟؟! )

" دي كاميرا .. "

( لا يا راجل !!! )

رديت عليه بسخرية !

" ايوه كاميرا ... أصل انت لما ريم بتيجي دايمًا ..

كُنتم بتحبوا تتصوروا كتير في كُل حتة بتروحوها !! "

أكرم رد عليا ..

أما أنا فسرحت !!

قعدت أفكر في ريم ..

أنا أصلا مش فاكر شكلها ..

ولا فاكر هي بتعمل ايه في حياتها ..

ودلوقت ييجي ويقول لي بنحب التصوير ..

"مااااازن "

أكرم قطع عليا حبل أفكاري ..

بصت له وأنا لسه شارد التفكير ..

وسألته / ( طيب .. فين الصور اللي احنا بنتصورها .. )

"أممممم .. أكيد حتلاقيهم في مكتبك .. أو دولابك !! ..

أعتقد دولابك !! "

بصت له باهتمام ..

وحطيت الكاميرا على المكتب ..

ورحت داخل جوا الدولاب ..

دخلت جواه بالمعنى الحرفي ..

ما هو أصلا كل الهدوم بقت موجودة على الأرض ..

يا دوبك شوية هدوم في أرضية الدولاب ..

مع صندوقين صُغيرين ..

- فتحت واحد من الصندوقين ..

وأنا باقول لأكرم /

( بس تعرف يا أكرم .. أنا حاسس إن ريم دي حيكون وشها حلو عليا ..

مع إني مش فاكرها .. بس عادي يعني ..

حاسس إني حافتكر حاجات كتير لما أشوفها !! )

"وليه لأ !! "

بقى هو ده اللي قدره عليه ربنا !!

لأ وايه .. قال الكلمتين وهو بيهز دماغه بطريقة سخيفة ..

بصت له بقرف .. ونسيت الصندوق !

وواضح إنه أخد باله !

" اه ه ه .. عمومًا .. انت وريم دايمًا على اتفاق .. وبتحبوا بعض أوي .. "

رد أكرم عليا وهو بيحاول يتدارك الموقف ..

( بنحبوا بعض .. بنحبوا بعض .. اهي على الأقل طلعت أختي مش خطيبتي .. )

وضحكت بعد الجملة دي بهستيريا !

- الصندوق الأول اتفتح .. وكان فاضي ..

في نفس اللحظة .. باب الأوضة اتفتح بعد خبطتين خُفاف ..

كانت ماما طبعًا ..

"ايه يا حبيبي .. ايه يا أكرم .."

سلمت علينا احنا الاتنين بسرعة ..

كان واضح إنها لسه جاية من برا ..

وبعدين قالت لي / " أختك ريم جاية الساعة 4 يا مازن .. "

هزيت دماغي بالموافقة ..

وسألتها وهي بتخرج ..

/ (وهي ريم أختي بتشتغل ايه يا ماما ؟! )

- ماما دخلت تاني الأوضة ..

وبصت لي وقالت / "ريم عندها 14 سنة يا حبيبي !! "

هزيت دماغي تاني مرة ..

وساعتها فتحت الصندوق التاني ..

كان فيه صوري ..

أنا وريم !!

أخدت الصندوق وشاورت لصاحبي عليه ..

بس هو واضح إنه كان عارف ايه اللي في الصندوق ..

بص لي وقال / " أنا حاطلع أشوف لو مامتك محتاجة مساعدة في حاجة "

وبعدها خرج بسرعة ..

>>>>>>>>>  <<<<<<<<<

- كان واضح من شكلها ..

من حجمها .. من طولها ..

كان واضح إن ريم صُغيرة فعلاً ..

واللي كان واضح أكتر إننا بنحب التصوير جدًا ..

كان لينا حوالي 200 صورة في الصندوق ده ..

صور كُلها في مُناسبات مُعينة ..

فواضح إنها كانت بتيجي في المُناسبات ..

صورنا كانت إما على البحر ..

أو في أعياد ميلاد ..

أو مع البالونات ..

في كافيهات ..

في الشارع !

أو في عربية !

أغلب الصور كانت لينا احنا الاتنين بس ..

وساعات كان بيكون معانا أكرم في الصورة ..

أو سمر أو شاب تاني معرفتهوش ..

واضح إننا بنحب بعض جدًا ..

كُنا قُريبين في كُل الصور ..

زي ما نكون أكتر اتنين إخوات بيحبوا بعض ..

على الرغم من إننا مش من نفس الأم ..

قلّبت في الصور الكتيرة ..

شُفتهم صورة صورة لغاية ما زهقت ..

كانت الساعة 1 الضُهر ..

يعني فاضل 3 ساعات على وصول ريم من المكان اللي عايشة فيه ..

قررت إني أنزل وأشتري لها أي هدية ..

ده احنا برضه مشفناش بعض بقالنا سنة !

قال يعني أنا فاكر !!

- المرة دي مغيرتش التي شيرت ..

يا دوبك شِلت كُل الهدوم في الدولاب بشكل مُهمل ..

وسرّحت شعري المنكوش ..

ولبست نضارة شمس لقيتها في أرضية الدولاب ..

وخرجت ..

أخدت صاحبي ونزلنا .. علشان نشتري هدية لريم !

يمكن ريم حتكون الشخص التاني ..

الشخص التاني اللي حيقدر يجيب الشخص الأولاني !!

>>>>>>>>>  <<<<<<<<<

- مشوارنا لشراء الهدية ..

مكانش المفروض ياخد مننا كتير ..

فمحل الهدايا كان قُريب إلى حدٍ ما ..

في أول الشارع اللي اتعودنا نمشي فيه ..

بس أنا كُنت ماشي بهدوء ..

عاوز الوقت يعدي علشان الساعة تيجي 4 وريم توصل !

وضيف على كده كمان ..

اللي حصل في محل الهدايا ..

أنا دخلت المحل ..

وأنا مش عارف ايه الهدية المناسبة لبنت عندها 14 سنة ..

أجيب لها دبدوب ؟؟ ... عروسة لعبة ؟؟!

ياااه .. يا ريتني طلبت من سمر تيجي معايا وتساعدني ..

بس سمر مكانتش ظاهرة من الصُبح ..

المهم .. لقيت عروسة لعبة شكلها ظريف كده ..

وعاملة شعرها ضفيرتين !!

طلبت من البياع الشاب إنه يلفها لي هدية ..

أما أكرم فكان بيبص لها باشمئزاز !!

البياع الظريف اللي هو تقريبًا أصغر مني ..

أخد العروسة ..

ولعب لي حواجبه وهو بيقول لي / "هي دي ليك ؟؟ "

بصت له بنظرة علامة التعجب ..

ورديت / (اه ليا .. علشان ألعب معاها وأسرح لها شعرها !!)

أكرم ضحك غصب عنه !

أما البياع فوشه أحمّر ..

وقال لي / "20 "

واضح إنه التمن !!

طلعت الفلوس ودفعتها له ..

وأخدت الهدية منه .. وهو برضه لسببٍ ما كان بيلعب لي حواجبه ..

- رجعنا تاني بنفس البُطئ الرهيب ..

ولمّا وصلنا لشارعنا ..

كانت سمر واقفة في البلكونة ..

لابسة أسود برضه ..

سمر بصت لي وابتسمت ..

وشاورت لي بايدها ..

شاورت لها وأنا حاسس بقلبي بينبض ..

دققت في وشها بملامحه الهادية الواثقة ..

وشعرها اللي كان أحلى طبعًا من شعر العروسة اللعبة !

- سمر شاورت لي تاني ..

وبعدين شاورت على باب العمارة بتاعتنا ..

كان فيه عربية لونها أحمر راكنة !

عربية أول مرة أشوفها ..

- أكرم مسكني من ايدي ..

وقال لي / " ده السواق بتاع ريم !! "

سوااق !!

ريم معاها سواق ..

بس أنا مرضتش أعلّق !!

جريت بسرعة ..

وفتحت باب العمارة ..

وطلعت ..

أكرم سبقني على السلالم ..

وفتح لي باب الشقة ..

كانت ماما عند الباب ..

وجنبها ريم !!

"مُصيبــ .. مااازن "

ريم اتلجلجت أول ما شافتني !

- وقفت !!

دققت فيها ..

كان شكلها أكبر مما توقعت !

واضح إنها سابقة سنها !

كانت جميلة ..

شبهي لحدٍ ما ..

شعرها عملت له ديل حُصان ..

وكانت لابسة شيميز أسود في أحمر ..

وبنطلون أسود ..

وعٌقد في رقبتها بينتهي بشكل قلب فضي !

كانت في مُنتهى الشياكة ..

فضلنا باصين لبعض فترة ..

وأنا باحاول استجمع روحي ..

باحاول أخد نفسي واحد ورا التاني ..

باحاول أفتكر ..

لغاية ما قلت لها / ( ريم !! )

ابتسمت بشكل جميل !

اديتها الهدية اللي جبتها لها ..

( دي هدية بسيطة جبتها لك !! )

- أخدت مني الهدية وايدها بتترعش !!

فتحتها ..

طلعت العروسة اللعبة ..

وبدأت عينيها تدمع !

والدموع زادتها جمالاً !

- أنا استغربت ..

أما هي فمسكت الهدية بايد ..

ومسحت دموعها وهي بتتنهد بالايد التانية ..

قالت لي / " انت فعلا اتأثرت .. "

وبعدها حضنتني !!

حسيت بالأمان .. على الرغم من إني ما افتكرتش حاجة !!

>>>>>>>>>  <<<<<<<<<

- دخلت أنا وريم على أوضتي ..

سألتها / ( انتي بتعيطي ليه ؟ )

ضحكت من ورا دموعها ..

" لو كُنت مازن قبل الحادثة .. كُنت يستحيل تجيب لي عروسة لعبة !! "

وضحكت تاني ..

وأنا ضحكت معاها ..

"وبعدين انت خسيت جدًا !! "

قالت الجملة باستغراب ..

وأنا اكتفيت بالصمت ..

- هي اللي قعدتني على السرير ..

ومسكت صورنا اللي سبتها على السرير ..

بصت لها بأسى ..

كان نفسي أسألها هي مالها ..

بس حسيت إني مليش الحق في كده ..

أنا في الأول والآخر مش فاكر حاجة عنها !

بس هي اتكلمت / " مازن .. سنة بحالها من آخر مرة شفتك فيها .. وحشتني بجد !! "

كانت بدأت تستجمع قوتها .. واضح فعلا إنها شخصية قوية ..

وإن دي كانت لحظة ضعف نادرة !

بصت لها وأنا ساكت ..

وسبتها تكمل / " كاميرا !! "

كانت بتشاور على الكاميرا بتاعة أكرم على المكتب ..

(اها !! ) رديت عليها ..

" انا مش عارفة .. مش عارفة لو كنت حتقبل اعتذاري ..

بس أنا مجتش فعلا أشوفك بعد ما فقت .. 

بس أنا والله جيت لك وأنت في الغيبوبة أكتر من مرة !! "

قالت كلامها بسرعة .. بتلهف .. بتوسل ..

كانت بتطلب مني في نبرتها الحادة إني أسامحها على حاجة أنا مش فاكرها أصلا ..

( ريم .. اهدي .. ولا يهمك .. أنا أصلا مش فاكر .. يا ريتني أقدر أفتكر !! )

بصت لي بنفس النظرة الأولى اللي بصت لي بيها لما دخلت الشقة !

وبعدها قامت من على السرير ..

ونطت طلعت فوقيه .. وربعت !

قالت لي / "عمّض عينيك !! "

ضحكت وغمضتهم !!

- مسكت ايديا ..

"حاول تفتكر .. افتكر لما كُنا بنخرج سوا في اليوم اللي باجي فيه هنا !! "

" انت بنفسك قُلت الأيام دي هي أحلى أيام عُمرك ! "

" حاول تفتكر .. اعتمد عليا !! "

حسيت بأنفاسي بتزيد .. وقلبي بيدق ..

تخيلت سمر في الأوضة ..

(اعتمد عليا ) .. قالت الكلمتين كمان مرة !

فتحت عينيا ..

وركزت في عيون ريم ..

عيونها السودا !

زي سواد الليل ..

وفي عيونها نجمة !

مش زي النجوم !

كانت أكتر براءة من أي شيء شفته !!

أو افتكرته !!

>>>>>>>>>  <<<<<<<<<

| مِن سنة فاتت !! |

أنغام موسيقا الجاز كانت عالية جدًا !

احنا حتى مُكناش سامعين نفسنا واحنا بنغني كلمات الأغنية !

في لحظة ايدي كانت بتصقف في الهوا !

وفي لحظة كانت بتسمك ديركسيون العربية !

ريم .. كانت قاعدة في الكُرسي اللي جنبي ..

بتصقف هيا كمان ..

بتطرقع صوابعها !

احنا الاتنين لابسين نضارات شمس ..

وهوا البحر بيطير شعرنا !!

أنا على فكرة مش مُتهور ..

ولا باعرض حياة أختي الصغيرة للخطر ..

أنا أصلا كُنت راكن العربية على جنب ..

مكُناش بنتحرك !

- الأغنية خلصت ..

واحنا الاتنين ضحكنا ..

طلعت علبة سجاير من تابلوه العربية ..

أخدت سيجارة وعزمت على ريم ..

بصت لي نظرة عنف رهيبة ..

مقدرتش أمنع إحساس الخجل اللي بتُصيبني بيه كُل مرة ..

قالت لي / " مش انت وعدتني تبطل سجاير في اليوم اللي اجي ازورك فيه "

ابتسمت لها ببراءة / ( وانا لسه عند وعدي يا آنسة !! )

أخدت مني السيجارة وعلبة السجاير ..

ورمتهم من الشباك !!

لعبت في شعري .. وأنا عامل مكسوف لسه !!

- ريم قالت لي / " يلا بينا .. طير بينا يا مُصيبة !! "

وبعدين شغلت أغنية تانية من السي دي بلاير في العربية !

سُقت العربية على أعلى سرعة مسموح بيها على طريق الكورنيش ..

فضلنا نغني ..

ونهيص طول الطريق ..

وهوا البحر المنعش بيحسسنا إننا أحياء !

لغاية ما وصلنا الكمين !

كان فيه لجنة !

بتوقف عربيات .. وتعدي عربيات تانية !

لجنة في الوقت ده !!

دي لسه الساعة مجاتش المغرب يا جدعان !!

طفيت الكاسيت ..

وده بمجرد ما ضابط المرور المنفوخ ..

شاور لي إني أركن على جنب ..

- ريم قلعت النضارة ..

وفضلت تبص لي بتحدي ..

مكانتش خايفة ..

أنا باحب البنت دي اوي ..

صف العربيات كان كل السواقين فيه شباب !

في نفس سني تقريبا أو أكبر أو أصغر !

الضابط وقف مع كل واحد ربع ساعة ..

أنا فضلت جوا العربية مخرجتش ..

لغاية ما الضابط وصل ..

رُخصك !!

- عطيته الرُخص من غير ما أبص له حتى ..

ريم / " إلا قولّي يا مُصيبة .. هو ليه الضبوطة الجميل ده ..

بيوقف الشباب الصغيرين الحلوين اللي زيك بس ..

وبالذات البنات .. "

كملت لها كلامها / (الحلوين اللي زيك طبعًا )

ريم هزت دماغها .. وضحكنا احنا الاتنين !

الضابط بص لنا باستغراب رهيب ..

تلاقيه فكرنا سكرانين ..

دلوقت حيطلع لنا البالونة ننفخها !

أصلا في بلدنا مفيش بالونات !!

البالونات مسموح بيها في الاحتفالات بس !!

"افندم !!! "

الضابط شخط فينا احنا الاتنين !!

ضحكنا تاني مُتعمدين استفزازه !

وبعدها بثواني قلت لريم / ( أقولك يا ريري .. أصلهم بيدعوا إن الشباب دول معاهم رخص مزيفة ..

بس هم طبعا بيحبوا يعاكسوا البنات !! )

وبعدها كملت / (الحلوين اللي زيك !! )

ريم هزت دماغها ..

والضابط وشه احمّر من تحت الخوذة اللي لابسها ..

"انزل انت وهي .. انزلوا بسرعة .. "

بصيت لريم وقلت لها / ( ما تجربي تدي له حتة بوبي دوج آيز !! )

ريم بصت ببراءة .. عينيها كانت بتنور تقريبًا ..

أي حد لازم يصعب عليه المشهد البريء للطفلة الجميلة دي !!

الضابط هبد على العربية ..

( واضح إنه مش نافع معاه .. ده عاوز البوبي ذات نفسه .. )

- الضابط مسك اللاسلكي اللي معاه ..

اتكلم فيه ..

قال نمرة عربيتي ..

وبعدها بثواني ..

قال لي / " انزل يا روح أمك !! "

ريم تأتأت ..

وأنا بصت له بتحدي ..

قال لي / "العربية دي مطلوبة .. مُسجلة باسم مازن عرفة ..

ومطلوبة هي وصاحبها .. "

كملت للضابط الكلام / ( ومطلوب إحضاره حالا .. المدعو مازن ..

الشهير بمصيبة .. ما أنا عارف .. !! )

ريم ضحكت ..

وبعدين فتحت الباب !!

ونزلت !

قالت لي / " حتكون كويس ؟؟ "

هزيت دماغي .. وجاوبت / (المعتاد يا ريري .. يا رب بس عمرو يكون عنده وردية النهارده ! ) !

الضابط شاور لها وقال بعنف / " اقعدي يا آنسة .. انتي حتيجي معاه "

قلت له بهدوء مُبالغ فيه / " كلمها باحترام .. والآنسة دي تبقى أختي ..

وعندها 13 سنة .. يعني ملكش حكم عليها ..

وبعدين ما قالك صاحبها .. 

صاااااحبها .. مُصيبة اللي هو أنا !! "

تعمدت أقول اسم مُصيبة بصوت عالي ..

الضابط حسّ بخوف بسيط واستشف التحدي في لهجتي ..

ريم نزلت ..

لكن قبل ما تنزل .. قالت لي / " أبيض على طول .. يا مُزز !! "

ده الدلع التاني لمازن .. 

ضحكت لأختي غير الشقيقة ..

وقلت لها / ( أبيض على طول !! )

كانت آخر مرة أشوف فيها ريم !

اليوم ده .. كانت الحادثة !

>>>>>>>>>  <<<<<<<<<

| دلوقتِ !! |

كانت آخر مرة أشوفك فيها ..

اليوم ده حصلت لك الحادثة !!

ريم هي اللي كانت بتحكي ..

أنا للأسف مفتكرتش أي حاجة ..

كُنت باتخيل كُل كلمة بتقولها !!

كُنت مصدوم ..

وهي كانت مبسوطة باللي بتحكيه ليا ..

عينيها .. عيون البوبي دوج آيز .. العيون البريئة دي ..

خلتني أتوه جواهم ..

ساعدتني على التخيل !

واهي نوايا تسند الزير ..

على الأقل لقيت حد ..

لقيت حد يقول لي على حاجة !!

سألتها وأنا مش قادر أستنى الإجابة / ( كانت ايه الحادثة يا ريم ؟!)

"مش عارفة .."

جاوبت عليا وصوتها بدأ يوطى ..

" أنا فاكرة إني سافرت اليوم ده قبل ما ترجع انت من القسم ..

وبعدها سمعت عن الحادثة .. 

بعدها مقدرتش أشوفك لفترة طويلة ..

بابا كان بيمنعني .. "

سألتها تاني بعد الصدمة / ( هو بابا ... هو بابا فين ؟)

ابتسمت ابتسامة بريئة وردت / " هم قالوا لي مقولكش !! "

ضحكت جامد ..

( يااااه .. للدرجة دي .. )

قامت ريم من على السرير ..

وباستني من دماغي ..

"أنا حأبات هنا النهارده .. وحاسافر الصُبح .. أهم حاجة إني شفتك .."

( ريم ... شُكرًا !! )

قلت لها الجملة وأنا في حالة اللاوعي ..

قالت لي / "على ايه يا مازن ؟"

( على كل حاجة .. )

ريم خرجت من الأوضة بسرعة ..

بدأت أستوعب كل كلامها وأحداث حكايته اللي من سنة ..

دققت في الكلام ..

الأبيض .. مُصيبة .. مُزز .. عمرو .. الضابط .. القسم .. الحادثة ..

يمكن ريم ساعدتني ..

بس أنا للأسف مفتكرتش حاجة ..

فكرت فجأة ..

( ديسبرت تايمز !! .. الأوقات الصعبة بتحتاج تصرفات حاسمة ) !

أنا فعلا محتاج أفتكر ..

فتحت دُرج المكتب ..

طلعت نوتة صغيرة ..

مسكت التليفون ..

وطلبت ..

" ألو !! "

صوت رجالي رد عليا !!

( دكتور سعيد ؟! )

سألت الصوت !!

"ايوه أنا !! "

(أنا مازن عرفة !! )

(حضرتك قلت لي أكلمك بعد شهر من آخر زيارة ليا !! )

"مااازن .. أهلا أهلا .. أنا مستنيك على فكرة قريب ..

تعال وقت ما تحب !! "

( شُكرًا )

وقفلت السكة ..

المُكالمة كانت مُختصرة جدا ..

بس على الأقل ..

حاتكلم مع شخص أنا فاكره كويس ..

أنا فاكره لإني معرفهوش غير بعد ما فقت من الغيبوبة !!

- رميت نفسي على السرير ..

فكرت في كل أحداث اليوم ..

فكرت في سمر ..

فكرت في أكرم ..

فكرت في دكتور سعيد اللي قررت أروح له بكره ..

فكرت في ريم !

وحسيت لأول مرة بمعنى الأغنية ..

It Takes 2 Baby !

أنا تقريبًا لقيت الشخص الأولاني ..

تقريبًا لقيت نفسي ..

حتى لو لسه مفتكرتش !!

يُـــتـــبــع !

مــــازن !

TNT

4/7/2010

إهداء إلى N3

مُلهمتي لشخصية "ريم" !

: ))