آه يا مجلِس ... آه يا شـ ـعـ ـب !

آه يا مجلِس ... آه يا شـ ـعـ ـب!

 

أنا فاكر زمان ..

لمّا الواحد كان لسه صُغير ..

وكنا بنتفرج على مسلسل الساعة 8 بالليل !

ويا دوبك كنت بأدخل أنام بعد المسلسل ..

بس اللي كان بيغيظ دايمًا ..

هو مرحلة ما قبل المُسلسل ..

واللي كانت بتبدأ من أول أخبار الساعة السادسة ..

وبعدها ساعة متواصلة من الملل غير المُنقطع !

ساعة كاملة بنشوف نفس الخِلق كل يوم ..

بنفس الكلام .. وبنفس البلاهة !

والأهم إننا في كل الأحوال مكُناش بنفهم منهم حاجة !

الساعة دي كانت بث لجلسات مجلس الشعب المُبجل !

والصراحة أنا باتعجب ليه ساعات كُنت بأنام قبل الساعة 8 !!

-أنا بقالي سنين وسنين ..

محصلش ما بيني وبين السياسة عمومًا غير تواصل بسيط جدًا !

أما عن تواصلي مع مجلس الشعب ..

فأنا طبعًا لا رحت انتخبت سيادة النائب الفُلاني ..

وده لا يرجع لكوني معييش بطاقة انتخابية -وحدّث ولا حرج-

ولا يرجع السبب لإن النائب الفُلاني وعدني بحاجة ولم يوفِ بوعده !

لأ طبعًا .. احنا النواب بتوعنا في مُنتهى النزاهة !

لكن السبب إن مجلس الشعب هو في الأول والآخر متغيرش !

متغيرش من أيام ما كنت باشوفه وأنا في إبتدائي !

يعني بغض النظر عن بعض الفضايح اللي ظهرت في السنين اللي فاتت !

من سي ديهات وإلخ إلخ إلخ ..

وده مش ذنبهم !

يعملوا ايه يعني .. مكانش فيه سيديهات على أيام زمان !

- وتمُر السنين ..

وأفقد اتصالي غير الحميم بالسياسة ..

والتليفزيون بتاعنا يخرب لمدة سنة !

ونتحرم من جلسات المجلس الموقر !

ويوم ورا يوم ..

ويكبر الشاطر (تي) .. اللي هو أنا !

ويبقى راجل ملو هدومه ..

وتشاء الأقدار إن التليفزيون يغير القناة لوحده !!

ياللهول !!!

إنها لمُعجزة !

إنه السيد سرور بنفسه !

لا زال مُبتسمًا .. يُنادي على المساجين !

مسجون مسجون ...

فيقوم الشخص المطلوب ..

ليعترض .. أو يشجُب !

أو يسُب ويلعن !

أو يُدندن ... فليحيا الرئيس .. فليحيا الرئيس !!

- طبعًا .. الكلام ده كله كلام بطيخي ..

يعني النُسخة الساخرة من اللي الواحد نفسه يقوله الصراحة !

الحكاية بقى ...

إن الست الوالدة .. 

قررت أن تحرمني من قنوات الطبخ الحبيبة !

وقناة الناس الدينية الدعائية !!!

وبالصدفة .. جابت لي القناة الأولى !

وفوجئت بمجلس الشعب !!!!

وكُنت بدأت أنام تدريجيًا ..

لأول مرة منذ سنين ... كنت حأنام تاني قبل الساعة 8 !

لكن لستر ربنا .. النور اتقطع !!!

أحمدك يا رب !!

- بس أنا كنت شفت البلاوي دي تاني !

وسبق السيف العذل ..

وخمسة في سبعة يا سيادة النائب !

فلو حبيت أقسم لكم الـ 444 نائب في المجلس ..

ولا ننسى معهم .. رئيس المجلس الموقر (فتحي شُرور) !

وصف الوزراء العواجيز !

فحتلاقي من النواب ..

(المُنفعلين) .. ودول دايما مُنفعلين ..

ما بيصدقوا يتنادى على اسمهم ..

ويقوموا يخبطوا في الحلل ..

- وفيه كمان (المُعتدين) ..

ودول مُعتدين بنفسهم جدًا ..

وبيفخروا بأصلهم ..

ولازم يطلعوا بالقفطان والعمِة والبُلغة !!

- وعندك يا سيدي (المُبتسمين) ..

ودول أي اتنين جنب بعض قاعدين يبتسموا للكاميرا ..

وزميلهم النائب اللي واقف بيتكلم !

- وفيه نُسخة مُعدلة منهم ..

وهم (المُهرجين) ..

واللي شفت منهم واحد امبارح !

أول ما الكاميرا جت ناحيته .. 

عمل لها (باي باي) !!!!!!!!!!

- وعندك طبعًا .. الفصيلة الأبدية من النواب ..

(النائمين) !

ودول نايمين على طول ..

- وفيه (المعفنين) .. ودول دايمًا تلاقيهم بيهرشوا !

- وفيه النواب (السيس) ...

ودول كانوا بيعاكسوا النائبة الفاضلة وهي بتتكلم !

- وعندك (النائبات) ودول جروب لوحدهم طبعًا ..

بالأحمر والأخضر اللي حاطينه ..

طبعًا عاوزين يغروا أعضاء المجلس فائقي الجمال !

- وفيه مجموعة (اللي مش مصدقين نفسهم ) ..

ودول بقى أول ما بيقوموا يتكلموا ..

يفضلوا يسحبوا المايك ناحيتهم في قمة الغباء ..

لإنهم أول مرة يشوفوا مايك طبعًا !

- طبعًا فيه أصناف تانية كتيرة ..

زي الإخوان، وأصحاب الفضائح، واللي بيتكلموا في الموبايل، واللي بيتاوبوا على طول !

وعلشان منجمعش .. نقدر نقول إن فيه نائب واحد بس ممكن يكون كويس !

بس هو فين .. الله أعلم !

- أما أهم اكتشاف اكتشتفته في الدقايق البسيطة اللي شفت فيها المجلس امبارح ..

هو إن كل نائب بيقوم يتكلم في موضوع تاني أصلا غير اللي باقي بيتكلم فيه ..

وإن كل شوية .. لازم نائب يقوم كي يشكر سيادة الريّس ...

أصله رئيس والنعمة كويس !!!

- ومع انقطاع الكهرباء عن المكان ..

قرر (تي) أن يتشح بالسواد لبقية الزمان !

فلو كان هؤلاء هم نواب الشعب !

فما بال الشعب !

وهكذا يُصبح الحداد على مجلسنا الموقر واجب على كل إنسان !

و "آه يا مجلس ... آه يا شعب !! "

ومُنذ هذه اللحظة ..

لا أرى عيبًا في أن نمتنع عن انتخاب النائب الفلاني ...

ولا أرى عيبًا ..

أن يتحول (تي) إلى  (تيتي) !!

و خليك في حالك !

TNT

22/6/2010