سبت، حد، اتنين، تلات، أربع، خميس، جُمعة... "حاقدِم السبت" !

سبت... أحد (بدون الألف)...

اتنين... ثلاثاء (اسمُه تلات)...

أربعاء (أربع)... خميس...

............. جُمــعة............

- 1 -

حاقدِم السبت...

علشان أشوف في عينيكي نظرة بجد !

حاقدِم السبت...

علشان في يوم الحد، حاعرف بجد...

إن كان مكتوب لنا نصير اتنين،

إن كان مكتوب لنا نكون سوا، 

ولا نصيبنا الفُراق.

-2-

أنا شاب زي الورد...

جاي مقدِم السبت.

- عاوز عروستي -

قاعدة في الكُرسي،

جنبي زي ما نكون في الكوشة.

أشبُك ايديّا... وهي تبكي !

- خليكي جنبي -

-3-

خليكي فاكرة إني شاب زي الورد...

جايّ مقدَم السبت.

طالب ايديكي.. من أبوكي..

أمك تزغرد... وأخوكي،

يضحك !

وأختك تصوّت !!

قال ايه هي الكبيرة..

قال ايه أنا المناسب..

طفِشّتني، وراحت عليكي،

كل الجوازة.

روحي اعملي زي ما قُلتي..

روحي الطُمي على وشها.

-4-

يوم الخميس...

 حاكتب كتابي وابقى عريس...

بس الدعوة مش عامة...

 مُش فارقة، مُش هامّة.

ما هو أصل الجوازة في السر،

لأجل تكاليف الفرح..

لأجل فستان الخطوبة وفستان الزفاف...

لأجل السعادة والهنا من سُكات..

لأجل ما في يوم الجمعة، 

نقضوا لنا يوم عسل... وننفصِل..

لأجل ما اتحسر وافتكر،

إني كنت شاب زي الورد... كان جاي مقدم السبت

وطالب منكم في يوم الحد، تدعولي في كنيسة الرب...

وأمله في زغاريد الاتنين..

وشبكة يوم التلات..

وحِنة الأربع...

وخميس الكهارب والمعازيم...

لأجل مسمعشِ أيًا من كلام...

خدها اللئيم...

جوازتهم العرفي...

ولا ليلتهم في الخميس...

ولا الخسيس ابن الخسيس !

-5-

مين اللي قاعدة جنبي ؟!

انتي ولا فستانك ؟!

فُستانك أبيض وبيلمع..

مش ناقص غيرك جواه!

السبت الجاي حاروح وأدوّر..

على واحدة تانية تملاه.

* الأيام... لا تنتهي.

طارق نادر

11 أغسطس  2011