سبت، حد، اتنين، تلات، أربع، خميس، جُمعة... (ذكـرى تـتعاد) !

سبت... أحد (بدون الألف)...

اتنين... ثلاثاء (اسمُه تلات)...

أربعاء (أربع)... خميس...

............. جُمــعة............

- 1 -

الحد الجاي جاي بعد يومين...

الحد الجايّ أول يوم في المدرسة...

الحد الجاي لمّا جه، كِتافنا وقعت،

من حِمل واجب محتاج له بدال اليوم اتنين.

قُلنا مشاكلنا عويصة، وإحنا صغار في المدرسة...

قُلنا زميلي ضربني، وراح سبقني واشتكى...

قُلنا ده لعب عيال... ما تشوف الهموم جوا البيوت ضعفين..

ما تشوف هموم النفس... أسابيع تفُك فيها، وتتعقد لفين ؟!

-2-

اتنين شم النسيم...

بنت الجيران واقفة لوحدها،

خالعة الحجاب.

شاورِت لي... قال ايه أنا اتكسَفت...

غمَزِت لي... شاوِِرت...

نادت عليّا... مسمعتهاش...

اتكسَفِت، بصِت بعيد...

دققت ياما في وشها...

قُلت جميلة ولا فيش زيها.

قامت راشقاني ببيضة ملونة،

لون الايشارب الطاير عندي في البلكونة،

وكاشف شعرها !

-3-

30 يوم على الامتحان... والجبس ملفوف.

30 يوم باغسِل وأنضف، وأسمع وأشوف،

القلم على الورق والجبس يكتب.

30 يوم نازل لوحدي،

لافف في سوق... بافاصِل وأشتري.

قاعد لوحدي... باذاكر في خوف،

على الجبس لا يكونشِ مشدود كفاية.

30 يوم ورُحت امتحنت.

وفي الامتحان ياما افتكست...

بس في الآخر، نَجحت.

بركة دُعا الوالدة في الشهر اللي فات.

لمّا كانت رجليها في الجبس ملفوفة،

وأنا على رجليّا لافف من سُكات.

-4-

أنا وقتي مربوط...

بالمعنى الحرفي للكلمة.

متكتف بخيوط...

أواخرها في ايد الماضي ملفوفة.

قالّك الذكرى تحيا لما تتجدد...

بس الذكرى لو عادت،

ما بتكون ذكرى.

* أيام الأسبوع... تتكــرر.

طارق نادر

12 أغسطس  2011