مـصـر اليـومــ فيــ عــيــد !

مش حاتكلم عن المواقف الأكثر من رائعة اللي شُفناها كلنا...
مش حاتكلم عن مشهد الآلاف أمام لجان الإستفتاء...

مش حاتكلم عن الدعايا والتوجهات السياسية والحزبية...
مش حاتكلم عن الخطوة الجديدة اللي كلنا بدأنها النهارده...

ولا حتى حاتكلم عن إن الناس كلها بتتصور مع صُباعها حاليًا !!

مش حاتكلم عن كل ده... لإن فيه مواقف كتيرة ومُختلفة كل واحد فيكم شافها النهارده.. سواء رُحت تدلي بصوتك في الإستفتاء، أو اكتفيت بمُراقبة المشهد لإن سنك لم يتعدَ الـ 18 ... ويا سلام بقى لو ساكن جنب ولا فوق ولا أدام مدرسة كان فيها لجنة انتخابية... ده انت أكيد شفت كتير !!

أنا حاتكلم كشخص عادي جدًا... حاتكلم عن يومي اللي كان يوم مُميز ومُختلف في حاجات كتيرة، أساسها طبعًا كان الإستفتاء.

* صحيت الصُبح محتار، ومش عارف اختار...

بس نزلت الساعة 11 الصبح، وأنا مش عارف حاروح لجنة ايه...

كان شعور هايل... وانت ماشي في الشارع... وبتشوف الناس البسيطة جدًا كلهم ماشيين... رايحين جايين في أكتر من اتجاه...

أكتر من اتجاه لكن كلهم بيودوا على مكان واحد... شعور هايل إنك تشوف الستات اللي عادةً مش بيتكلموا في الشارع...

بيسألوا بعض/

(إلا قولي لي يا ختي... هي فين اللجنة ؟!)

(والنبي لو سمحتي... هي فين المدرسة اللي فيها اللجنة ؟!)

(إحنا خلاص استفتينا... روحوا انتم بقى... دي بتخلص بسرعة...)

* عديت من جنب لجنة... كانت زحمة ... الناس كتيرة... ناس كبيرة كلهم واقفين ... متنظمين..

الطابور مش زي طابور العيش ولا طوابير السوق، ولا طوابير الحكومة....

الطابور بيخلص، وبيخلص بسرعة... والناس مبسوطة، مش فارق معاهم الشمس أو الحر...

* عديت من جنب لجنة تانية...

كانت مشغلة بصوت عالي أغاني وطنية...

(أصله معداش على مصر ؟!!)

(مصر اليوم في عيد !!!)

فعلاً مصر اليوم في عيد... بغض النظر عن إن اليوم هو في الأصل (عيد تحرير طابا)...

لكن خطوة الإستفتاء جعلت الآلاف من الناس يخرجون من منازلهم ليُدلوا بأصواتهم.

عند اللجنة دي... لقيت واحد بيقول لي/

"ايه ... صوتت ؟! ... ما تيجي هنا... اللجنة اهي..."

رديت عليه/

"لأ .. لسه ... ربنا يسهل"

بصيت على ايديه، علشان اشوف لو ماسك أي منشورات أو حاجة..

بس مكانش ماسك ! ... شيء لطيف.

* قابلت صاحبي واستنينا صاحبنا التالت...

وفي وقت انتظارنا... قابلنا راجل مُحترم في الشارع...

سألنا عن رأينا في الإستفتاء... جادلناه لمدة طويلة...

حاول يقنعنا إننا نقول (نعم) ... حاولنا نرد عليه...

جالنا يمين... جالنا شمال...

وفي النهاية... توصلنا كلنا إن أهم حاجة في الغد إن الجميع يحترم النتيجة.

*يمكن فرحي الأكبر النهارده مكانش مُجرد الإستفتاء...

لكن أني رحت أقول صوتي في لجنة مدرستي الثانوية السابقة اللي مرحتهاش من سنين.

كان شيء بديع... وانت داخل تشم ريحة الجنينة بتاعة المدرسة...

وتقف في الملعب -اللي عمري ما لعبت فيه- وأشارك بصوتي.

وقفنا في طابور طوييييل لآخر الشارع...

لكن عملية الإستفتاء بأكملها مخدتش 8 دقايق !!!

الناس كانت من أعمار وطوائف ومستويات مُختلفة... كان فيه ناس نازلين بهدوم البيت اللي عليهم...

* عسكري الجيش شاف بطايقنا...

* دخلنا المدرسة...

* موظف اللجنة رحب بينا بشكل ودي جدًا...

* أخدوا البطاقة، وأدونا الورقة...

* كتبت صوتي عن اقتناع إلى حد كبير...

* صاحبي طلع جنيه فضة وقال (ملك = نعم).

* طلع له (ملك) ... واختار (لا ) !

* الموظف سألني أنا اخترت ايه، وقال إني أكيد زي باقي الشباب باقول (لا)..

* قلت له / "الله أعلم" ... مش مهم أنا قلت ايه... المهم إني قلت !!

* خرجنا من اللجنة، و أنا حاسس بانتعاش... وصُباعي لونه (بمبي) !

* قابلنا صُحابنا... ورُحنا لجنة تالتة...

كان الإقبال عليها الضعف تقريبًا...

استنينا... سمعت كلام الناس... سيبك انت من الكلام في السياسة...

أهم حاجة إن الناس كانت مبسوطة.

* قابنا راجل تاني في السكة...

كلمناه برضه... حاول يقول إننا غلط في رأينا...

وبعدين الكلام انتقل لكلام سياسي بحت... فسابنا ومشى.

* راجل تالت... ورابع...

قالوا لنا / "برافو عليكم "

* التجديد في يومي على المستوى الشخصي...

منتهاش عند هنا ... لأ ... أنا رحت قعدت على البحر... على الصخور...

في جو هايل على مستوى الطقس والمشاركة... وقعدت على كافيه على البحر... قهوة في قولٍ آخر...

وشربت شاي من برا لأول مرة...

* رجعت بيتنا الساعة 6 مساءًا...

بصيت على اللجنة بتاعة الصبح اللي كانت زحمة... 

وكانت لسه زحمة !!!

**** مش مهم أنا قلت ايه ...

**** مش مهم النتيجة ايه ...

**** مش مهم ان اللجنة مكانتش بالكفاءة المتوقعة والمفترضة..

**** ومش مهم أصلا إن الإستفتاء بمدته لا يعطي فرصة لجميع المصوتين...

المهم.. إن مصر اليوم في عيد :)))

حاجة واحدة أخيرة ..

لما تشوفني بكره ...

يا ريت تقول لي /

(صباح الحُرية) ....

ba3d el Estfta2 !

T

19 مارس 2011